الخميس، 7 أبريل 2011

آخر ما سأدون


هتكلم فى عنوان التوبيك بس فى الآخر

أيادى بيضاء ويد واحدة سوداء ( دعوه للتفاؤل)

هكذا لابد أن ننظر للوضع الحالى فى مصر

أيادى بيضاء تبنى مصر ويد واحده سوداء تخرب ما تبنيه الأولى

أيادى بيضاء تستكمل الثوره ويد واحدة سوداء تسعى للقضاء عليها

أيادى بيضاء تمد يدها للسلام ويد واحده سوداء تزرع الفتنه بين ذوى القلوب الضعيفه

نعم هى يد واحده ولكن بإيديكم أنتم تسطيعوا أن تنشروا تلك اليد بدون أى قصد

نعم  هى يد واحده التى تنشر الشائعات وتزرع الفتنه وتقنعكم بفشل الثوره وتزرع اليأس فى قلوبكم

لذا أحلفكم بالله ألا تكون قلبوكم تربه خصبه لتلك اليد

أحلفكم بالله ألا تضعف قلبوكم  امام تلك اليد اللعينه

أحلفكم بالله ألا تستسلموا للشائعات وأن تضعوا حب مصر نصب أعينكم ولا تدعوا أحد يشتت إنتباهكم عنها

أحلفكم بالله ألا تنشروا أى خبر سلبى ولو صحيح

أحلفكم بالله أن تكونوا أنت من ينشر التفاؤل والأمل

أحلفكم بالله أن تثقوا بالله أكبر ثقه و تقتنعوا أن الله يريد لمصر كل خير

أهملنا تاريخهم ..... فسيأتى من يهمل تاريخنا ( دعوه للقراءه  فى تاريخ مصر)

معلش بقى هتكلم بالعاميه شويه

إحساسك ايه؟؟؟؟؟؟؟  تعالى كده نركب آله الزمن ونروح المستقبل

قاعد مع ولادك وبتحكيلهم عن الثوره وبتقولهم بقى انك نزلت الميدان والأمن ضربك واللى جنبك أستشهد ورشوك بالميه ورموك بالحجاره وتحكيلهم عن الهتافات وإزاى أصريت انك تفضل فى الميدان وعن الأخلاق اللى شوفتها فى الميدان وعن الحب والود والتآلف وإزاى المسيحى كان جنب المسلم وإن المسيحى رفع المصحف والمسلم رفع الإنجيل

وولادك :- خلاص يا بابا بقى احنا زهقنا ......... يووووووه يا بابا الثوره تانى .......... يا بابا الثوره خلصت خلاص .......... يا بابا مصدقينك والله خلاص بقى............... أحمد مش احنا ورانا مشوار؟ يلا بينا نكمل بعدين يا بابا ...... ياااااااااه دى الساعه سبعه طب أستأذن انا بقى يا والدى عشان انام.....

 طب بالله عليك إحساسك ايه؟؟؟؟ إحباط؟ غضب؟ مفروس؟ هتنفجر فيهم؟ 

طب ما تيجى نفكر كده ........ مش ده اللى احنا سببناه للناس اللى قبلنا ؟؟؟؟

لما واحد جه يحكى بكل حماس  عن اللى عمله فى حرب 73 أو  يحكى عن أيام السادات أو أو أو

رديت عليه قولتله ايه؟؟؟؟  أقولك انا قولته ايه :- خلاص بقى يا عمنا احنا فى 2011 دلوقتى مش 73

الله يرحمه بقى السادات بقولك ايه شوفت ماتش امبارح؟ الأهلى عمل ماتش ميه ميه

طيب انت سببتله إحباط أهو  ليه بقى ولادك مش يسسببولك إحباط وانت عارف طبعا أنه كما تدين تدان

قاعده ترغى ترغى ترغى يا أمل ما تقوليلنا قصدك ايه بقى وتريحينا

حااااااااااااااااااضر  هقول أهو واجب علينا نقرأ فى التاريخ نعرف التفاصيل نعيش اللحظه ههههههههه

لاء بجد لازم نعرف تاريخ مصر ومتقولش بقى طب ما انا عارف 

اللى انت عارفه ده طشاش..... قشور مش أكتر لازم تعرف ايه اللى حصل بجد 

ماده التاريخ فى الدراسه كرهتنى فى تاريخ مصر بجد والله كلها كانت حفظ دون أى تشويق كلها بم تفسر والنتائج المترتبه على

بس  غير كده بجد التاريخ بجد ...... التاريخ مشوق جدا الى أقصى درجه طيب جرب تقرأ فيه وبجد هتقول أمل قالت

أنا ( المسلم ) قبطي وهو  ( المسيحى) قبطى ( دعوه لمواجهه الفتنه المقصوده )

بس براحه عليا بس ومتشخطش فيا كده

فى الفرعونيه كلمه قبطى تعنى مصرى......... أه وربنا 

الفتنه مقصوده ولن يختلف أحد معى قى ذلك طيب هو ينفع يبقى فيه فتنه وانا أقوم دجايه ف الكليه مثلا وكل ما أقابل حد أقوله على فكره فيه فتنه......... سمعت عن الفتنه يا دكتور؟ .........  ده المسيحين بيقولوا علينا كذا كذا ........ والمسيحين يقولوا ده المسلمين بيقولوا علينا كذا كذا ........ انا عارفه اننا مش بنبقى قاصدين اننا ننشر الفتنه بس رغم كده بننشرها 

طب وبعدين معانا بقى؟ يعنى هو ينفع كده؟ طيب مش المفروض نمسك لسانا شويه؟

طيب ممكن نراجع نفسنا؟؟؟ بس اقف بس مع نفسك كده وقول انا ساعدت ان الفتنه تتنشر بنسبه كام فى الميه؟؟؟؟ ممكن؟

نرجع بقى لعنوان التوبيك

همشى ؟؟؟ أه همشى طب ليه ؟؟؟؟ عشان أرضى ربنا وردا على الشاب الصح ( هل يوجد أسمى من هذا هدف؟ )

طيب مش انا كنت قولت انى هكمل تدوين ؟؟؟؟ نعمل ايه بقى يا جماعه .... سبحان مقلب القلوب ولا ايه؟؟؟؟

طيب هرجع تانى؟؟؟؟ على حد علمى إنى مش هرجع لكن يا عالم ربنا كاتب إيه؟؟

طيب قدرت إزاى آخد قرار أنى اسيب التدوين وأسيب المدونين بالسهوله دى؟؟؟؟ مين قال أنى أخدت القرار بسهوله؟؟؟؟؟؟؟

طيب انا سعيده بقرارى ؟؟؟؟ أكيد طبعا سعيده جدا  سعيده عشان هرضى ربنا سعيده عشان هرجع أحافظ على وقتى سعيده عشان
ههتم بحياتى أكتر سعيده عشان حطيت خطه أمشى عليها سعيده عشان حاسه ان ربنا راضى عنى لما قولت أبعد عن النت

ليه بقى مبقاش سعيده؟؟؟؟ 

بس حزينه............. حزينه لأنى هفارقكم بس لما أرجع افتكر هدفى من أنى اسيب التدوين برجع سعيده تانى

أستاذ ماجد القاضى ............ أستطعت أن تغير فى سلوكياتى دون حتى أن تشعر أنك تغيرها فجزاك الله عنى كل خير

المنشد أبو مجاهد الرنتيسى...... ربنا يكثر من أمثالك أخى

أستاذ نور الدين محمود ..... كنت خير صديق لى يا فندم  فتذكرنى دائما بالخير أستاذى

الشاب الصح ......... دائما ما كانت نصائحك  فى تدويناتك تأتى فى وقتها لى وكأن ربى يرسل لى من يرشدنى للطريق الصحيح

إبن بلدى................. لن أنسى أحد أعزه بهذا الشكل أبدا 

مصر الفرعونيه........... انت عارف من غير ما أقول مش كده ؟

عاشور.......... أعتذر عن كل كلمه أخطأت فى حقك بها وأعرف أنك ستقبل إعتذارى أخى وأعلم اننى لم أقصد أبدا ما فهمته من كلامى وقدر الله وما شاء فعل

ميدو الأهلاوى............ ربنا يوفقك فى حياتك متنسانيش بقى وانت بتدعى أوك؟

استاذ جمعاوى........... لن أنسى أبدا كيف يجب أن نكون فى خدمه الآخرين ونكون نعم العون لهم فجزاك الله خيرا :)

لكل مدون وصديق لم أذكره ......... أشعر أننى أفارق جزءا من روحى بفراقكم فلا تنسونى من دعاءكم لى بالهدايه

وأخيرا............. لن أنساكم فتذكرونى دائما بالخير وأدعو الله أن يجمعنى بكم وهو على كل شىء قدير

السلام عليكم ورحمه الله وبركاته













هناك 16 تعليقًا:

كلمات من نور يقول...

أنا مش معاكي في قرارك

وشكلي حنزل فيكي التحرير

مدونه ما كفايه بقى يقول...

كلمات من نور

هههههههههههه كلو عليا كده مش حضرتك بس

ادعيلى بس بالهدايه وربنا يقدم اللى فيه الخير

خواطري مع الحياة يقول...

هو يعني النت ومدونتكهو الي يجيب لك المعاصي
هي الي يضيع وقتك
تقدري انك توفقي بين ده وده
تحددي وقت للنت والمدونة
انت عارفة انك ماتعملي شي وحش في النت
ولا ايه
عارفة انك ماتغضبي ربنا
يعني حددي وقت مش كل وقتك بالنت
على العموم ربنا يهديك ويصلح حالك وبالك
وان شاءالله ترجعي وتفكري
تقبلي مروري ^_^
سلامي لاطيب بنوتة.

لورنس العرب يقول...

قرار غير مبرر ابدا وغير صحيح

فاتيما يقول...

فيه كام حاجة عاوزة اقولها

1)
اول مرة اعرف اسمك الحقيقى
ومبسوطة قوى عشان اختك فاتيما بينادوها ف البيت والعيلة بنفس الاسم ..
يعنى عندى أسمين ...
:)

2)
حالة العزوف التدوينى دى
بتحصلنا كلنا
وكلنا تقريبا خدنا قرار اعتزال التدوين دا وبنرجع ...
فإن شاء الله مش هيكون آخر بوست
أتمنى ذلك يعنى


3)
اسلوبك حلو يا امل
و دماغك حلوة
و الكتابة تفريغ لطاقة وافكار
وتبادل خبرات بين الناس
وانتى كتبتى اسامى محترمة كتير أثرت فيكى
وانتى كمان أكيد أثرتى فيهم
فليه تسيبى دا كله وتمشى ؟


4) إرضاء الله سبحانه وتعالى
ممكن جدا .. مع بقائك هنا برضو
ف إيدك الاختيار يا حبيبتى
المسألة مش صعبة قوى كدا
هيا عاوزة بس طولة بال ونفس
واظنك قدها وقدود يا حبيبتى

5)
اتمنى اعلق ف البوست الجاى
و يكون قريب
وساعتها
اقولك

حمدلله ع السلامة

:)

كونى بخير دايما

محمد محمود عمارة يقول...

الأخت الفاضلة أمل عبد الحميد
لقد أنزعجت عند قراءة هذا البوست لعدة أسباب :
أولاً بسبب نوع الخط اللي عمانا و احنا بنقراه
ثانياً لأن اسمي مش موجود في خطبة الوداع
ثالثاً و ده الأهم إني شخصياً مش شايف أي مبرر حقيقي يخليكي تسيبي عالم التدوين.
شوفي يا أستاذة أمل و أرجو إنك تتقبلي كلام واحد عمره ضعف عمرك وزيادة شوية ، انت من خلال كتاباتك و من خلال تعليقاتك ادتيني انطباع انك نوعية من الشباب النقي الطيب اللي لسه على الفطرة و اللي عاطفة التدين عنده عاليه .
( العفو ، علشان أنا عارف انك بتقولي شكراً ، احممممممم ، ده انطباعي مش مجاملة)
مفيش أبداً تعارض بين تدينك و التزامك و بين تعبيرك عن أفكارك من خلال متنفس متاح هو المدونة، و انت حاولي تنظمي وقتك بين طاعتك و دراستك و مدونتك.
و بعدين يا ستي المسلم يومه كله طاعة، طاعة بالذكر و بالكلمة الطيبة و الكلمة النافعة أو الصمت عن شر أو إثم و الامتناع عن معصية ، بأمر بمعروف و بنهي عن المنكر.
يا أخت أمل أنصحك نصيحة يا ريت تنفذيها و هتفرق معاكي كتير في تنمية مداركك و طريقة تفكيرك و تدينك ، عايزك تنزلي من على موقع فور شير اللي تقدري عليه من كتب الشيخ محمد الغزالي و اقريها و بعد متخلصيها نزلي كتب الشيخ القرضاوي و انصحك تبدأي للشيخ القرضاوي بثلاث كتب : الصحوة الإسلامية بين الجحود والتطرف ، فقه الأولويات ، الحلال و الحرام .
لما تخلصي الثلاثة دول اقرأي له باقي كتبه.
أخت أمل منتظر تدوينتك القادمة و ربنا يهدينا و يهديكي
كفاية عليكي كدة ، سلام

وردة الجنة يقول...

ازيك يا أمل

بجد انتى وحشانى جداااااااو بحب مواضيعك وبجد البوست ده زعلنى منك اوى لان مين مننا مش هيكون حابب انه يكون قريب اوى من ربنا ويكون ليه عبد مطيع

عشان ربنا يكرمنا

امل ياريت متبعديش ولو حسيتى فى فترة انك عاوزة تعملى حاجة ابعدى فترة بس ارجعى تانى بس مش تسيبينا كده

هستناكى على فكرة وهستنى منك البوست الجديد

تقبلى مرورى اختى الغالية

الشاب الصح يقول...

السلام عليكم ورحمه الله و بركاته

انا بجد مش مستغرب القرار علشان يمكن اخذت القرار ده اكثر من مره لكن الواحد بيتعامل مع الموقف بحكمه و تعود الامور الى مجراها و لكن من وجهه نظرى مشكلتك انك توازنى بين شئون حياتك وتتحكمى فى تصرفاتك مش اكتر على فكره و تذكرى دائما انك صاحبه رساله تستطيع ان توصليها من خلال مدونتك للاخرين فاجعلى من مدونتك ارضاء لله و المسلم كيس فطن فيكون جمع بين الامرين فلو هدى الله بيكى فرد خير من الدنيا و ما فيها هو كده مش ارضاء لله فنصيحتى البسيطه لحضرتك انك تعيدى ترتيب اوراقك و اولوياتك على اساس صحيح و هو ارضاء الله و الرضا عن نفسك ثم ارضاء الاخرين و تتحكمى فى تصرفاتك و تحافظى على نفسك يمكن انا صريح حبتين لكن انا اعلم جيدا ما يدور فى ذهنك بحكم تعاملى مع شباب كتير و اهتمامى بمشاكلهم تشوفى انت ازاى ممكن ترضى ربك عن طريق مدونتك و ازاى تكونى فى نفس الوقت راضيه عن نفسك و عارفه انك ماشيه صح و مفيش حاجه غلط او مش راضيه عنها (استفتى قلبك) و ترضى اخوانك اللى بيطلبو منك انك تكونى معاهم و تكملى تدوين و ده الحل الامثل لحل المشكله
و تذكرى ان الله هو الوحيد الذى يقدر ان يكتب لكى الخير و تذكرى

قال صلى الله عليه وسلم :

عجبا لأمر المؤمن إن أمره كله خير وليس ذاك لأحد إلا للمؤمن إن أصابته سراء شكر فكان خيراً له وإن أصابته ضراء صبر فكان خيرا له

و مقوله غاندى:
my life is my message
اسأل الله سبحانه و تعالى ان يهديك الى سبيل الرشاد .... و الحمد لله رب العالمين

========>♥ ◕‿◕ ♥<========
اللهم لولاك ما اهتدينا ولا تصدقنا ولا صلينا فأنزل يا ربي السكينة علينا وثبت الاقدام ان لاقينا
========>♥ ◕‿◕ ♥<========

لاتــــي Lati يقول...

اختي المميزة ..
تتسلل مشاعر الاحباط الى دواخلنا من حين لاخر..نسرع للتوقف عن التدوين
مع انه الشئ الاكثر اهمية في حياتنا،
والاكثر قيمة بالنسبة لنا.
وسيلتنا الممتعة والانسانية في توصيل رسالتنا والعمل على مناقشة والدفع الى الامام بقضايانا المشتركة والخاصة.

يحزنني ان ارى مدونة او مدوناً من حولي
يغادر..
لكني افعلها ايضاً..
رغماً عني..بشر
تحت مشاعر ضغط كبير، وسعياً لانقاذ اعصابنا وارواحنا المتعبة نعتقد ان التوقف عن التدوين..عما نفعل هو السبيل لذلك.
لكنه لايكون كذلك صدقيني..
خمس سنوات الان اختبرت تلك المشاعر مراراً ووجدت ان ترك التدوين ليس هو الحل.. يمكننا اخذ استراحة المحارب
لكن وقف العمل ليس حلاً.

ان شاء الله سوف تدركين ان التدوين
وسيلتنا المتاحة للتعبير عما نؤمن به ونريد ايصاله للعالم بصوت عال.

الله يحميك ويهدينا جميعاً لنافيه كل الخير

مع اصدق تمنياتي صديقتي

ماجد القاضي يقول...

السلام عليكم أختي حفيدة البنا..

طبعا أناديكِ بهذا اللقب لأنك تفتخري بكونك إخوانية.. ودعيني اسألك للمرة الثانية: هو ده اللي اتربينا عليه؟!
مش قلت لك قبل كده: خسارة تتركي أي منبر استطعت التمكن منه؟

عامة إن كان السبب بالفعل هو تعارض التدوين مع رضا الله وترتيب الأولويات.. فطبعا أنتِ غلطانة (من ساسك لراسك) وهو ما أكد عليه كل المعلقين الكرام الذين سبقوني..

أما إن كان السبب (وهو ما أرجحه رغم تصريحاتك) هو حالة زهق مؤقت، أو خواء وإحساس بعدم القدرة على العطاء.. فهذا طبيعي (كما ذكر بعض المعلقين أيضا).. ولا ألومك عليه.. لكن فقط لدي نصيحة: لا تقرري غلق المدونة.

.......................

أختي الكريمة أمل.. لا أنكر تأثري الشديد برسالتك لي؛ لأني والله لا أجدني أستحق هذه المكانة (وإن كنت أشكرك جزيلا على حسن الظن بي).. وتأثري جاء من انتباهي مرة أخرى إلى المسئولية الأدبية والشرعية الواقعة عليّ كمدون يحاول أن يكتب شيئا محترما، وأن علي الانتقاء الشديد قبل أن أكتب ما قد يضر..

وأشكرك على تنبيهي الأول لهذا الأمر ساعة بداية الثورة (لعلك تذكرين)..!

نصيحة أخيرة: أرجو بشدة أن تقرئي كتاب الشيخ الغزالي (جدد حياتك)، وإن كنت قرأتيه فأعيدي القراءة ولن تندمي.
....................

أختي الكريمة: هذا إيميلي إن أردت أي استفسار أو استشارة؛ فإن لم تكن لدي الإجابة أو الفائدة مباشرة، فبالتأكيد لدي من أحيل إليه استشارتك.. (في مصر وخارجها).

magid_alkady@yahoo.com

تحياتي مع تمنياتي بدوام التوفيق..

الشاب الصح يقول...

هذه هديه تفضلى
http://elshabelsa7.blogspot.com/2011/04/blog-post_08.html

المنشد أبو مجاهد الرنتيسي يقول...

بسم الله وبعد
هذا الخبر غير موافق عليه وهذا القرار يبدو أنه أخذ بتسرع فنرجو منك أن تراجعي حساباتك وترجعي كما كنت ومن جانبنا ندعو الله لنا ولك ولجميع الأصدقاء أن يوفقنا لما يحب ويرضى ويسدد خطانا ويغفر لنا ذنوبنا ويتجاوز عن سيئاتنا

إخوانك في الله
أبو مجاهد الرنتيسي
أحلام الرنتيسي

صاحب مدونة مصر الفرعونية يقول...

انا قبل ما اعلق دايما بقرا التعليقات

على عكس كل التعليقات السابقة
انا مؤيد جدا للفكرة دى لان انا نفسى لما كنت بزهق من النت كنت بشيله ولما احتاجه ارجعه تانى

ميجراش حاجه لو سيبتى النت مش حتموتى يعنى ولا حيجرالك حاجه هو قرار صعب لاننا كلنا ادمنا النت

الخلاصة
هل ستصمدين؟

مدونه ما كفايه بقى يقول...
أزال المؤلف هذا التعليق.
مدونه ما كفايه بقى يقول...

مصر الفرعونيه

أخيييييييييييييييييرا لقيت حد واقف معايا :)

والله تعليقك رفع معنوياتى بجد

أنا حسيت أن كله ضدى فاضل شويه ويروحوا الميدان

الخلاصه

قول يا رب

مدونه ما كفايه بقى يقول...

طيب حضراتكم مش ملاحظين حاجه؟

كل اللى علق علق على نقطه واحده فقط ذكرتها فى الموضوع اللى كتبته دون أى تعليق على باقى النقط!!!!!!

يا جماعه والله والله والله لو تعرفوا السبب الحقيقى وراء تركى المدونه والتدوين هتأيدونى فى قرارى

أنا بحلف بالله ......... يا ريت بقى تأيدونى فى قرارى

الشاب الصح مش عارفه أقول لحضرتك ايه غير جزاك الله خير الجزاء على هديتك

انا قولت لحضرتك وبقولك تانى دايما ربنا بيرسلك ليا لترشدنى للصح بجد والله مش بجامل حزينه جدا انى هبعد عن نصائحك بس انا متأكده ان ربنا هيبدلنى خير بإذن الله

استاذ محمد عماره
هو يعنى حضرتك شايف انه ضرورى جدا انى أذكر أسمك ؟؟؟؟؟؟

يعنى حضرتك يعنى مش عارف مقامك عندى دون أى ذكر منى؟؟؟؟؟

والله زعلت وأدينى بعيط أهو عاااااااااااااااااااا
هرجع أقوك لحضرتك تانى :- تدينى وإلتزامى يفرض عليا ويلزمنى أنى أسيب النت كله لأسباب غير معلنه لكم لكن لو أعلنتها بجد بجد هتأيدونى فى قرارى بنسبه متين فى الميه دعوااااااتك

حااااااااااااااضر هقرأ الكتب دى بجد هقرأهاإن شاء الله بإذن الله بإذن الله والله المستعان



فاتيما : هتصديقنى لو قلتلك أنه مش مجرد عزوف تدوينى مش كده؟

حبيبتى انا مش عارفه أبررلك سببى إزاى غير انى اقولك بجد انا هسيب التدوين عشان ربنااااااااا

يعنى يرضيكى أفضل موجوده مقابل غضب ربنا عليا؟؟؟؟؟ :(

انا عارفه طبعا انه مرضيكيش

وأرجع اقول تانى لو عرفتوا سبب تركى للتدوين هتيأيدونى بنسبه مليون فى الميه

فاتيما حبيبتى أكيد ده شرف ليا ان يكون أسمك هو أسمى أكيييييييد :)))))

ورده الجنه

والله العظيم كل ما ألإتكر انى مش هكلمك تانى عينى بتدمع وانا بحلف بالله

بس طبعا انتى فى قلبى أكيد

حبيبتى والله ما اقصد نهاااااائى ان اللى بيدون بيعصى ربنا بالعكس ده من أنواع الجهاد جهاد الكلمه يا قلبى

وبجد بقى زعلت أنك فهمتينى بالشكل ده :)

هحاول والله أرجع تانى بس انا بس أظبط حالى كده وإن شاء الله أرجع :)

لاتى

تأكدى حبيبتى أن ولا سبب من أسبابك هيه اللى خليتنى اسيب التدوين :)

هتوحشينى :) اه وربنا هتوحشينى

بشر......... والله عندك حق فعلا بشر

هرجع بإذن الله هرجع بس أمتى مش عارفه

كل اللى أعرفه أنى مش هقاطع النت نهائى

لما أحس ان ربنا رضى عنى وأنى مش بغضبه ساعتها هرجع أتفقنا؟

يلا اقابلك على خير بإذن الله

الأخ الفاضل المنشد أبو مجاهد الرنتيسى

قرار أخذته عن قناعه وعن تمهل فلم أتسرع فيه

أعدك أخى أننى سأعود ولم لا أعود إلى متنفسى وإلى أناس غيروا منى إلى الأفضل وإلا أكون قد نكرت الجميل

سأعود ولكن متى الله أعلم

ولكن إلى أن يحين وقت العوده لك منى أطيب الأمنيات أستاذى وأتمنى ألا تنسانى من دعاءك

تحياتى الطيبه