الخميس، 11 نوفمبر، 2010

موضوع كوته المرأه خطير أوى يا جماعه

الحكومه لسه مفكره انها ممكن تضحك على الشعب المصرى الغلبان

كلمه للحكومه:- احنا غلابه اه بس واعيين يا حكومه

اضافوا مقاعد جديده خاصه بالنساء فى مجلس الشعب وأطلقوا عليها (كوته المرأه)

أولا يعنى ايه كوته:- كوته باللاتينيه تعنى حصه او نصيب أو قسم يعنى بالعربى كده نصيب المرأه فى مجلس الشعب

الظاهر هو  ان الحكومه عايزه تفعل الدور السياسى للمرأه وان يكون لها حقوق سياسيه متوسعه علشان كده عملوا لها نصيب فى مجلس الشعب وهو عباره عن 64 مقعد تتنافس عليه النساء من جميع المحافظات على ان تمثل كل واحده محافظه بأكملها

الباطن بقى بيوضح ان الحكومه دى (أعذرونى فى اللفظ) بنت تييييييييييييييييييت

ركزوا بقى معايا شويه

سيادتها الحكومه عايزه جمال مبارك يحكم فى الانتخابات الرئاسيه اللى جايه تقوم تعمل ايه (بنت التييييت دى)

تخلى فيه فى مجلس الشعب  المقاعد  ال64 بتوع المرأه بجانب تلتين المجلس الاساسيين (اللى هما بتوع الحزب الوطنى اللى مش ديمقراطى خااالص) والتلت الاخير الخاص بالاحزاب الساسيه الاخرى والمعارضه

علشان لما موضوع الحكم يتعرض فى مجلس الشعب يضمنوا ان تلتين المجلس موافقين على الحكم الى جانب ال64 مقعد بتوع كوته المرأه

وبما ان تلتين المجلس وكمان اربعه و ستين موافقيين على حكم جمال مبارك لمصر يبقى بسهوله جدا جمال مبارك هيحكم

الموضوع خطير أوى يا جماعه

جمال مبارك لو حكم يبقى البلد ضاعت مننا بجد

أملنا فى الله موجود وما دام بنعمل اللى علينا يبقى ربنا مش هيخذلنا

أرجوكم أنشروا الموضوع ده على قد ما تقدروا علشان اكبر قدر من الشعب المصرى يعمل حساب للمصيبه اللى ممكن تحصل

أعذرونى فى الاسلوب اللى بتكلم بيه بس بجد انا بغلى من جوايا من ساعة ما عرفت المصيبه دى

ربنا يستر


انا عايزه انهى الموضوع ببيت شعر يعبر عن كل اللى ممكن يتقال

إذا الشعب يوما أراد الحياه                 فلابد ان يستجيب القدر