الأحد، 20 مارس 2011

لو لم أكن مصريا لوددت ان أكون مصريا

الف الف الف مبروك ليكى يا مصر الف الف الف مبروك ليكم يا مصريين

مش علشان النتيجه نعم بقول مبروك علشان أول مره فى حياتنا كلنا نقول رأينا ويأثر على الحياة السياسيه بل على الحياة المصريه كلها

دى أول خطوه على طريق الحريه .... أول خطوه على طريق الديمقراطيه ..... أول خطوه على طريق التغيير

الطريق طويل أوى بس بيقولوا أن أول خطوه هيه دايما أصعب خطوه وأدينا خطينا كلنا مع بعض وعلى قلب رجل واحد أول خطوه

الخطوات الجايه مهما صعبت فمش هتبقى زى صعوبه الأولى أبدا

(أيه حكايه كلمه خطوه دى معايا مش عارفه )

نسيبنا بقى من نغمه الإخوان هيكتسحوا والإخوان أستلموا السلطه والبلد بقت فى يد الإسلاميين

الإخوان مش الشعب المصرى الإخوان مستحيل مستحيل مستحيل يخطفوا الثوره أو يقفزوا على رغبه الشعب المصرى لأن الشعب المصرى بقى واعى وعرف مصلحته فين ومش هيسمح لأى حد أيا كان أنه يفرض نفسه عليه وأنا أولهم

الإخوان جزء لا يتجزأ عن المصريين ونسيب الأيام الجايه هيه اللى تثبت حسن أو سوء نيتهم

بلاش نغمه إن المسحيين مش هياخدوا حقوقهم المسيحيين مصريين ومفيش مصرى مش هياخد حقوقه واللى مش هيعرف ياخدها ميدان التحرير موجووووووووووووود وأنا أول واحده هرجع الميدان لو معرفتش آخد حقوقى
( رغم إختلافنا فى النقطه دى)

(أيه حكايه كلمه حقوق دى معايا برده مش عارفه )

حمدا على سلامتك يا مصر رجعتى تانى أم الدنيا يا مصر رجعت أفتخر أنى مصريه رجعت أقول لو لم اكن مصريا لوددت أن اكون
مصريا

الأيام الجايه محتاجانا نحكم بعقلنا مش بعاطفتنا محتاجه نفكر فى كل خطوه بناخدها لحد ما نوصل لبر الأمان وهنوصل أنا متأكده

هنقابل محن كتيره أنا عارفه لكن هنتغلب عليها بالإراده والعزيمه القويه

وأخيرا أرفع رأسك فوووووووووووووق فأنت مصرى






هناك 12 تعليقًا:

رشيد أمديون يقول...

وفقكم الله، وايدكم بنصره
خطوة جميلة قامت بها مصر هذه الأيام.

غير معرف يقول...

مبروك عليكي يا أخت أمل ، كلامك محسسني إنك بتكتبيه و انتي بتتنططي من الفرحة ( تربية رياضية بقى )، أنا سعيد زيك بس علشان الناس حاسة ان دي بلدهم
و أكرر مقولة الزعيم مصطفى كامل : لو لم أكن مصرياً لوددت أن أكون من المنصورة

الميكروباص يقول...

الحمد لله على النتيجه
وما يفعله الناس من ردود افعال عقب عدم نفاذ رأيهم وضع طبيعي في أول يوم ديمقراطيه
نأمل أن ينصلح الحال في المستقبل

Dr Ibrahim يقول...

الله الموفق..

Days and Nights يقول...

الأخت الكريمة

ألف مليون مبروك لنجاح أول إستفتاء مصرى حر على مدار التاريخ .

تقبلى مرورى وتعليقى

تحياتى

أخوك / تامر

ENG./ELSAYED,PMP يقول...

انا مبسوط جداًان حضرتك فرحانة ... بجد والله
مع كونى قلت ( لأ ) للتعديلات الدستورية ... ومش زعلان خالص من النتيجة ... لأسباب كتير مطولش عليكى ف سردها ... وأتمنى بل وكانت هذه امنيتى من زمان بعيد أن يكون للأخوان حزب سياسى حتى لا يختلط الامر على بشكل شخصى حول توجههم ... فعندما يكون هناك حزب سيكون هناك برامج اصلاحية و خطط وأهداف وآليات لتحقيقها وبالتالى نكون بنتكلم سياسة ... كانت اكبر مشاكلى لفهم الاخوان المسلمين تبدأ من أول أسم الجماعة ... تخيلى ... ( أصل العبد لله فيلسوف حبتين ) بمعنى لو انا تلفظت بلفظة الاخوان المسلمين يبقى انا اقريت وتيقنت تماماً من انهم ( أخوان ) وانا معرفش بشكل قاطع انهم اخوان ام لاء ... فكنت بحس انهم فارضين على المتلقى تقرير ما لم يقم بأثباته هو وبنفسه بشكل قاطع وذلك عن طريق تلفظه فقط بأسم الجماعة ...ههههه ولا داعى لسرد اكثر من ذلك ... ولكن وبصدق وبدون قسم ... انا لا اكن للأخوان اى عداوة ... ولكن اريدهم ف ساحة السياسة ... ساسة ... دون خلط لأى اوراق اخرى ...! لست من ( الاخوان ) ولكن انا من ( المسلمين ) ... وقد يأتى ( الاخوان ) احياناً ما لا أرضى سياسياً عنه لكونى من ( المسلمين ) ...طيب ليه اللخبطة دى ...! أرى انه عندما يكون هناك حزب للأخوان ... وقد أعلن انه سيكون الحرية والعدالة ... سيكون هناك مساحة اكبر للأختلاف او الاتفاق سياسياً دون اى حساسية دينية ... فأنا عندما أنتقد حزب الحرية والعدالة ... وعندما لا أرتضى سياساته ...الخ ... لن اكون وقتها انتقد ( المسلمين ) ... لا احملك فوق طاقتك ولا احدثك على انك مسئولة عن كل ما سردت ولكنى اطرح رؤيتى الشخصية امام فتاة متحمسة جداً لما تعتقده صحيحاً... وهذا يعجبنى ...!
- رجاء حار انا مش بعلق علشان تزعلى ... لو زعلانة قوليلى متعتبش هنا تانى ... شكراً
سيد

غير معرف يقول...

انا بصراحه متلخبط ... هى اكيد فعلا خطوه كويسه جدا .. بس لو النيه صافيه .. انا كنت كل شويه احاول اقلل خوفى من الاخوان .. بس كل حاجه بيعملوها بتخوفنى اكتر ..
يعنى النهارده عصام العريان فى كل المحطات بيتكلم باسلوب الحزب الوطنى و يهدد الكل .. سواء على اون تى فى او مع عمرو اديب .. انا حاسس ان انا قدام حزب وطنى جديد و قريب مباك جديد حيجى
طب لو بقى عندنا رئيس من الاخوان .. يا ترى حيتبع قرارات مجلس الشعب المنتخب من شعب مصر ... و لا حيتبع قرارات مجلس شورى الاخوان المنتخب من الاخوان فقط .. و لا حيوفق ما بينهم.
انا النهارده حسيت ان احنا كنا بنستفتى على شئ مش عارفين نتيجته ههههههههه ... طيب يا ترى اللى صوت بلا هل عنده نتيجه واضحه ايه اللى كان حيتم لو كانت الاغلبيه بلا ؟؟؟
و هل اللى صوت بنعم هو عارف نتيجه التصويت "بوضوح" ؟؟؟
يعنى النهارده اللواء ممدوح شاهين بيقول حيكون فى اعلان دستورى "جديد" ... يعنى دستور مؤقت ... يعنى اللى صوت علشان الماده التانيه ما تتلغاش .. حيبص يلاقيها مش موجوده فى الاعلان الدستورى ... يا ترى انا صح ولا غلط .. انا حاسس ان انا تايه ههههههه ... و الله انا حتجنن انا مش عارف احنا ريحين على فين ... و مافيش اى وضوح
يا ترى هو الجيش عمل الاستفتاء ده ليه ؟؟؟؟ هل يا ترى الاستفتاء ده كان اختبار لينا كشعب و لا ايه ؟؟؟؟
بيتحفظوا على اموال مبارك بقلهم شهر .. كل يوم يقولو اتحفظنا عليها فى البنك الاهلى و اخرها النهارده فى جمهوريه البحر الاحمر العربيه ..
انا خلاص حشوفلى اوضه فى العباسيه .. حد عايز يجى معايا ؟؟؟
و لا فى حد فاهم ممكن يوضحلى ؟؟؟
و يا ريت لو حد رد عليا فى نتيجه الاستفتاء بنعم او لا يرد ردود محدده واضحه .. مش قراءات و استنتاجات و تخمينات ...
لان احنا المفروض كنا نستفتى على شئ نتيجته واضحه ...
يعنى فى ناس بتقول الانتخابات فى ديسمبر و ناس تقول فى شهر 7 ... هل حد عارف مثلا و متأكد هى امتى سواء المؤيدين لنعم او لا ؟؟؟؟

Mahmoud Ahmed يقول...

فعلا مبرووك لينا كلنا على ان الشعب راح و قال رايه
هو انا كان نفسي يبقي كتير قوي قوي و اكثر من 41 %
بس الحمد لله
احنا كنا فين و بقينا فين

الشاب الصح يقول...

الحمد لله انا مش قرحان ان نعم كسبت انا فرحان علشان المشاركه اضاعفت ربنا يقدر اللى فيه الخير

جزاك الله خيرا
========>♥ ◕‿◕ ♥<========
اللهم لولاك ما اهتدينا ولا تصدقنا ولا صلينا فأنزل يا ربي السكينة علينا وثبت الاقدام ان لاقينا
========>♥ ◕‿◕ ♥<========

غير معرف يقول...

السلام عليكى اختى الكريمه اتمنى ان اختلفى مع الاخوان لا يغضبك منى مدونة اكسجين مصر

Unknown يقول...

السلام عليكم ورحمة الله وبركاته
بداية حقيقية لعودة الوعى والهوية وفرحة كبيرة وعظيمة أتمنى ألا يفسدها البعض.....

مازن الرنتيسي يقول...

بسم الله وبعد
وفقكم الله لما فيه الخير وأدام العزة والكرامة تخيم على بلدكم الحبيب

إخوانك في الله
أبو مجاهد الرنتيسي
أحلام الرنتيسي