الثلاثاء، 15 مارس 2011

الأنيميا وسنينها

بعيدا عن الأحداث... بعيدا عن الأوجاع.... بعيدا عن التساؤلات..... بعيدا عن الهموم

حواربينى وبين الممرضه والدكتور


الممرضه: أنتى بايظه يا أمل خااااااااااااالص

أمل (ويعلو على وجهها نظره خوف) : ليه بس هيه النتيجه طلعت أيه؟

الممرضه: انا هخلى الدكتوراللى يقولك بس انتى بجد باااااااااااااااايظه

أمل (تحدث نفسها) : يا رب استرها اللهم أنى لا أسألك رد القضاء ولكنى أسألك اللطف فيه

,,,,,,,,,,,,,,,,,,,,,,,,,,,,
أمل : السلام عليك أزى حضرتك يا دكتور
الدكتور : وعليكم السلام الحمد لله أزيك أنتى يا أمل ...... أيه يا أمل ينفع اللى انتى عاملاه فى نفسك ده؟

أمل: ايه يا دكتور هو فيه ايه بالظبط؟؟؟

الدكتور: خمسه وستين يا أمل؟؟؟؟؟

أمل : هو ايه اللى خمسه وستين يا دكتور؟؟؟

الدكتور: نسبه الهيموجلوبين عندك خمسه وستين فى الميه معنى كده انك مش بتاكلى حديد غير قليل

أمل : أه يا دكتور حضرتك عايزنى أكل الحديد بتاع أحمد عز أزاى بس ده غالى جدا وكمان طعمه وحش يعنى ميتاكلش خالص

الدكتور: لاء اطمنى أحمد عز راح لحاله خلاص وكمان حطوا سكر فى الحديد علشان طعمه يحلو 

أمل مبتسمه : لاء إن كان كده ماشى

الدكتور: بصى يا أمل النسبه وحشه ولو فضلتى كده  فى مضاعفات هتظهر أحنا مش قدها

أمل : والحل يا دكتور؟

الدكتور : الإسلام هو الحل يا أمل
أمل مبتسمه:أكيد طبعا يا دكتور

الدكتور: خدى العلاج ده استمرى عليه لمده شهر وتشربى عسل أسود وتاكلى كبده وخرشوف وبنجر وطبق سلطه كل يوم وبيضتين  بلدى وبعدين تعملى تحليل كمان شهر                


أمل : أه كل شويه حقنه بقى يا دكتور ( إبتسامه خفيفه)

الدكتور: انتى هتاخدى البرشام دهبعد الغدا وده بعد العشا

أمل: ماشى البرشام مقدور عليه أشكرك يا دكتور جزاك الله خيرا ( وأمد  يدى لآخذ الروشته)

الدكتور : أستنى لسه الحقنه دى تاخديها كل أسبوع

أمل : لالالالالالالا حقنه لاء يا دكتور مالها الانيميا زى الفل دى حتى مخليانى رفيعه انا وانا مش بحب التخن

الدكتور: بصى العلاج ده يتاخد علشان مقولش لبابا وهو يتصرف معاكى

أمل: بالله عليك يا دكتور بلاش حقن منك لله يا أنيميا

الدكتور: ليه بس ده انتى بتحبيها دى حتى مخلياكى رفيعه

أمل: ده انا بكررررررررررها قال بحبها قال 

الدكتور ضاحكا: خلاص بقى بلاش دلع الحقن دى هتتاخد ولا ؟؟؟؟؟؟

أمل (وأقتربت الدمعه كثيرا من عينها) : هتتاخد يا دكتور


الدكتور : شفاك الله وعفاك يا أمل وأشوفك الشهر الجاى إن شاء الله

أمل : إن عشنا يا دكتور  السلام عليكم 

الدكتور ( ضاحكا): وعليكم السلام   مع السلامه يا أمل سلميلى على بابا وقوليله يشترى حديد علشان رخص

( وتخرج أمل من الغرفه قائله : إنا لله وإنا اليه راجعون)

باخد حقنه كل أسبوع وباخد البرشام وأشتريت حديد 

آآآآآآآآآآآآآآآآآآآآى أصلى لسه واخده حقنه

 منك لله يا أنيميا

تحياتى لكم




هناك 35 تعليقًا:

مازن الرنتيسي يقول...

بسم الله وبعد
بوركت أختي في الله على الطرح الطيب
آسف على التأخير بسبب ضغط العمل

إخوانك في الله
أبو مجاهد الرنتيسي
أحلام الرنتيسي

ليلى الصباحى.. lolocat يقول...

السلام عليكم ورحمة الله
هههههه الف سلامة من الانيميا ومن اى مرض حبيبتى
جميل البوست وخفيبف الظل كتير

بس على فكرة الانيميا مش شرط تساعد على الرفع فيه ناس تخان كتير وعندهم انيميا


اعتقد ان الشعب المصرى كله على كده عنده انيميا واتمنى انه فى المستقبل ومع نتائج الثورة الطيبة تتعالج ويعود اقوى من الاول ههههههه

تحياتى لك ياغالية والف سلامة من الحقن
دمت بخير

♥ ♥ Amira Samy ♥ ♥ يقول...

ههههههههههه
الف سلامة عليك يا امولة
ربنا يشفيكى من الانيميا
تسلمى حبيبتى على الطرح
تحياتى لك و حبى

Mahmoud Ahmed يقول...

الف سلامه عليكي ^_^
بس على فكره الانيما بتيجي في الرفيعين والتخان كمان
ده يمكن بتيجي في التخان اكثر من الرفيعين

ممكن خدمه بليز ؟؟ لو عندك صوره من التحليل بتاعك لو ممكن تبعتيلي منها صوره في المدونه عندي و متخفيش كده كده ، التعليق عندي مش هيظهر لأني عامل الاشراف على التعليقات ، و مش هنشره ،، بس عايز اعرف يعني ايه نسيه الهيموجلبين 65% ، لأنك انتي اكيد قصدك على حاجه تانيه ، مش قصدك على الهيموجلوبين .

^_^

افروديت يقول...

سلامتك ياقمر

وحشه اوي الانيميادي بجد

خللي بالك علي نفسك شوية انتي رياضية يبنتي يعني ده مهم جدآحتي للعادي

الشعب كله عنده انيميا أحمدعز خده كله ومش باين عليه خالص

تحياتي

الشاب الصح يقول...

السلام عليكم ورحمه الله وبركاته
شفاك الله و عفاك ان شاء الله
حسب علمى الصغير ان الانيميا بتيجى من ان قله تفاعل جزئ الهيموجلوبين مع الاكسجين اللى بيحتاجه الدم اللى فى الجسم كله انصحك بايه بقه فى علبه اكسجين اللى فى الصيدليه اللى بيضربوا بيها الشعر دى كترى منها مع كوب من الماء يوميا ان شاء الله نسمع خبر خير ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
انا بهزر اوعى تعملى كده هههههه
اسأل الله العظيم رب العرش العظيم ان يشفيكى
كان معكم نادر سيف الدين من قطاع الاخبار من اهدى مكان فى مصر
========>♥ ◕‿◕ ♥<========
اللهم لولاك ما اهتدينا ولا تصدقنا ولا صلينا فأنزل يا ربي السكينة علينا وثبت الاقدام ان لاقينا
========>♥ ◕‿◕ ♥<========

المصوراتي يقول...

السلام عليكم
:) هههههههههه الانيميا و مالو

شفاكِ الله و عفاكِ

انا موضوع الحديد دا حله معيا لا كان بدوا و لا ببرشام لكن فقط

عسل اسود و يتشرب هههه

مش يتاكل بس بالعيش

جزاكِ الله خيرا علي التدوينة

المدفعجي يقول...

موضوع جميل جدا
تشكراات

♥نبع الغرام♥♪≈ يقول...

حبيبتى حبيبتى

متشكره اوى على وجودك واحتفالاك معايا بمدونتى واجمل زغروته من القلب
ان شاء الله تترد ليكى يا حبيبتى
عارفه انا كمان زيك وبتعب من الانيميا وفقر الدم كمان
هههههههههههههههه
يعنى انا وانتى زى بعضينا

ربنا معاكى ياجميله

Unknown يقول...

السلام عليكم

ألف سلامة أختي الكريمة..

شفاك الله وعافاك..
أسأل الله العظيم رب العرش العظيم أن يشفيك..

رشيد أمديون يقول...

لطيف هذا الحوار.
حديد أحمد عز ههههههه على هذا فأكله صحي..ههه

أسال الله لك الصحة والعافية.

Unknown يقول...

شفاك الله وعافاك
إن شاء الله تلتزمين تعلمات الدكتور ويتم الشسفاء بمشيئة الرحمن

shabfa2re يقول...

كنت وانا صغنن بحب الدكتور يقوللى عندك انيميا واتفشخر اوى ادام اصحابى

Days and Nights يقول...

الأخت الفاضلة

مدونة جميلة ورائعة ... تقبلى مرورى وتعليقى ... ودمتى بكل الود

أخوك / تامر

فيلسوف زمانه يقول...

جميل جداااا وطريقة حلوة بدون مجاملة
وياريت تشرفينى فالمدونة بتاعتى
http://www.lovecity2000.blogspot.com/

شريف صابر يقول...

مساء الورد
اولا دائما تزيدي تالق بجد مش مجامله
ثانيا هو العلاج حقن وبرشام ولا الاسلام هو الحل؟
احتفليه مرور عام على مدونتك قربت يسعدنى ان اكون اول شخص يقولك مبروك
تحياتى ليكى

مدونه ما كفايه بقى يقول...

الأخ الفاضل المنشد أبو مجاهد الرنتيسى

جزاك اللهخيرا أشكركعلى مرورك الطيب أخى

مدونه ما كفايه بقى يقول...

أم هريره

وعليكم السلام ورحمه الله وبركاته
الله يسلمك يا حبيبتى

آه والله عندك حق أدى عز أخده كله ولسه رفيع شوفى بقى لما انا آخد جزءصغير منه هتخن؟؟؟

الله المستعان

أشكرك لمرورك حبيبتى

تحياتى لكى

مدونه ما كفايه بقى يقول...

سلسبيل

الله يسلمك يا قمر ربنا ما يكتبها عليكى لحسن فيها حقن :)

أشكرك لمرورك حبيبتى

تحياتى لكى

مدونه ما كفايه بقى يقول...

سبايدر مان

الله يسلمك يا رب

النتيجه معايا فى ايدى اهى لكن مش على الجهاز

انا ممكن ابقى اقولك اللى فيها

أشكرك على مرورك الطيب أخى

كل تحيه وتقدير

مدونه ما كفايه بقى يقول...

أفروديت

الله يسلمك يا حبيبتى

هيه وحشه علشان باخد حقن مش اكتر:)

ربنا يستر بقى

أشكرك للمرور حبيبتى

تحياتى الطيبه

مدونه ما كفايه بقى يقول...

الشاب الصح

جزاك الله خيرا ربنا ما يكتبها عليك يا رب

اممممم بتنصحنى بعلبه اكسجين الشعر مش كده

عارف انا لو عملت كده ايه اللى هيحصل؟

هتسمعوا احلى خبر فى حياتكم ( رحيل صاحبه مدونه مصر حره)ههههههههه

بس لاء مش هعمل كده انا قاعده على قلبكم رخامه بقى:)

هو من نحيه اهدى مكان فى مصر فهو أهدى مكان فعلا:)

أشكرك لمرورك أخى

تحياتى لك

مدونه ما كفايه بقى يقول...

المصوراتى

انت كده بتعمل بمبدأ زورونى كل سنه مرتين لاء بجد كده عداك العيب وأزح هههههههه

الله يكرمك أخى ادينى بشرب كبايه ونص عسل فى اليوم لعل وعسى

تحياتى الطيبه

ودى واحترامى

مدونه ما كفايه بقى يقول...

المدفعجى

هو الإسلام بيأمرنى أنى أكون دايما عندى حسن الظن

لكن مجرد سؤال حضرتك قرأت الموضوع فعلا؟ههههههههههههه

جزاك الله خيرا على المرور أخى

والله يكفينى شرف ان تمر بى دون حتى أى تعليق

تحياتى الطيبه

مدونه ما كفايه بقى يقول...

نبع الغرام

والله فرحانه اوىانك شرفتينى هنا وان شاءالله يدوم الود

الله يسلمك يا قمر تسلميلى يا رب

كل ود وتقديرلكى

مدونه ما كفايه بقى يقول...

الاستاذ المحترم ماجد القاضى

جزاك الله خيرا على تلك الدعوه فأنا فى أمس الحاجه الى قلب مخلص يدعو لى

أدام الله الود بيننا اخى

تحياتى لك

مدونه ما كفايه بقى يقول...

الأخ الكريم أبو حسام الدين

جزاك الله كل خير على مرورك أخى

اللهم أمين تحياتى الطيبه

مدونه ما كفايه بقى يقول...

الاستاذ محمد الجرايحى

سعيده جدا جدا جدا بتشريفك لى فى مدونتى المتواضعه أخى الكريم

يا رب

دعواتك لى أخى

كل تحيه طيبه لك

مدونه ما كفايه بقى يقول...

شاب فقرى

ههههههههههههه حلوه اتفشخر دى منكم نستفيد :)

اشكرك لمرورك أخى وأرجو المتابعه

مدونه ما كفايه بقى يقول...

days and nights

أشكرك أخى وأدام الله الود بيننا يشرفنى مرور أمثالك على مدونتى دون حتى
اى تعليق

مدونه ما كفايه بقى يقول...

فيلسوف زمانه

اشكرك على الإطراء أخى
إن شاء الله أصدقاء

تحياتى الطيبه

مدونه ما كفايه بقى يقول...

شريف صابر بدون مستر :)

مساء الورد والفل والياسمين

مش عارفه بس ليه المجامله دى صدقنى انا عارفه نفسى كويس كل يوم بنزل درجه:)

أنا رديت على سؤالك خلاص بقى هيه شغلانه:)

الله يباركلك ويبارك فيك وفى كل حبايبك اللهم آمين عقبااااااااااااالك

سعيده بالتعرف عليك أخى

ربنا يديم الود يا رب

تحياتى لك

اللي فرط يكرط!! يقول...

السلام عليكم ورحمة الله وبركاته

أسفة ع التأخير كعادتي

الف الف سلامة عليك اختي..
انت افتكرتك بتتكلمي عموماً

ان شاء الله بخير
ودايماً معافاة وبصحة تامة يارب..

لما امرض اهدأ جوات نفسي، واكره
روحت الدكاترة والادوية ..
اصل اطباء اليوم بيخوفونا اكثر ما بيعالجونا.
والدواء عند الله عز وجل وحده..
عارفة إن الاخذ بالاسباب حتى في اتقاء شر المرض ..لكن

بارك الله فيك اختي في الله

mrmr يقول...

الف سلامه ليكى يا قمر

يسيطه قوى ولا يهمك بس اهتمى كويس بالاكل اللى فيه نسبه حديد كبيره
السبانخ غنيه قوى بالحديد والعسل الاسود ولو مش بتحبى تاكلى العسل خدى مقدار 3 معالق كبيره ودوبيهم فى شويه ميه واشربيهم عصير

بالشفااااااا

موناليزا يقول...

شفاكى الله وعافاكى حبيبتى
الف سلامة عليكِ