الأحد، 27 فبراير 2011

من ما كفايه بقى الى مصر حره

تحيه طيبه لكل المدونين اما بعد

أعتذر عن فتره انقطاعى عن المدونه ( بس كنا شايلين النت فى البيت والله)

ثانيا مبارك على كل المصريين وكل العرب ثوره مصر والثوره خالفت توقعات كل اللى قالوا انها هتفشل (وانا مش منهم الحمد لله)

ثالثا تبعا للتغيير الذى حدث فى مصر فأعلن عن تغيير اسم المدونه من (ما كفايه بقى) الى ( مصر الحديثه) وذلك إبتادءا من الغد بإذن الرحمن

رابعا عايزه اتكلم شويه عن الجيش والى بيعمله فى مصر

الجيش تحركه بطىء جدا واعتقد ان فيه إجماع مننا على ده

انا شخصيا بدأت افقد ثقتى فى الجيش بسبب العمله الاخيره بتاعته دى 

كمان عايزه اتكلم عن موضوع انشاء الاخوان لحزب سياسى

انا مش موافقه على الموضوع ده لسبب بسيط الاخوان جماعه اسلاميه ويجب ان تظل جماعه اسلاميه وعلى فكره ده كلام الدكتور نحمد بديع قبل ان يتؤاجع ويقرر انشاء حزب سياسى الحزب ده هيخلى التوجه القائم للاخوان توجه سياسى لا غير والخوف من كده بسرغم كده انتمائى وولائى للجماعه تجبرنى على الثقه فى القياده وفى الخطوات والاختيارات التى تقوم بها الجماعه
كمان عايزه اوجه الف تحيه للاعلامى الشريف محمود سعد اللى من يوم ما بدأت الثوره كان محدد موقفه منها وأخيرا اثبت للجميع شرفه
عندما قدم استقالته غير مهتما المال او رئيس الوزراء انا حابه اقوله اربع كلمات وبين قوسين ( ربنا يكتر من امثالك )

اخيرا أذكركم بتغيير اسم المدونه الى مصر الحديثه ولنا لقاء قريب بإذن الله 

تحياتى لكم جميعا وتحيه مخصوصه الى  (ابن بلدى)












هناك 21 تعليقًا:

هبة فاروق يقول...

اولا حمد لله على السلامة يا قمر نورتى وحلو اسم المدونة الجديدة
وثانيا مش لازم نفقد الثقة فى الجيش ونصبر شوية يا جماعة والجيش قدم اعتزار عن ما حدث
الجيش هو املنا الوحيد دلوقتى فقليل من الصبر
وانا بقدم تحية وتقدير للمذيع والاعلامى محمود سعد وربنا يكتر من امثالة
تحياتى

أنا - الريس يقول...

نبارك لمصر
ونبارك لتونس
وهنبارك عن قريب ل ليبيا
فبسقوط الطغاة يسقط الفساد والمفسدين .
انا عن نفسي أثق في الجيش وأثق أن صنعه المفسدون خلال الفترات الرئاسية من بداية عبدالناصر إلي نهاية مبارك لا يمكن لأحد أن يحركه في شهر . فعلينا بالصبر وكما أنك تثقي في قيادة الجماعة رغم إنفراط فكرهم عن فكرك بإنشاء حزب ، أدعوك للتدبر والثقة في الجيش مع المطالبة وليست ثقة تجعلنا غافلين العيون ..

وان شاء الله نبارك ليكي اسم المدونة الجديدة .

الميكروباص يقول...

عود احمد ونتمنى عدم الغياب مرة أخرى

بالنسبه للجيش
لكل واحد طاقه من الصبر
لا ينبغي ان نترك الناس يفعلوا ما يريدون ثم ما ان يتعامل معهم الجيش نفقد فيه الثقه
الجيش موجود لحفظ النظام والمطالب المشروعه
فليس كل ما يطلبه المتظاهرون هو مطالب مشروعه لأنهم متظاهرون
فهذا الأمر قد يتحول إلى لعبه او تهريج مستقبلا

اما بالنسبه للإخوان- فلأني لست مهم فلا اتكلم عنهم

تحياتي وارجو عدم الغياب

مدونه ما كفايه بقى يقول...

لورنس العرب


كلامك صحيح الا حد ما بس ده ميبررش انه يضرب الناس باعتقادهم ان الشعب لازم يتهان ويتضرب علشان نسمع الكلام مش كده؟

اما بالنسبه للاخوان فمش الكل معانا ولا الكل علينا واحترمت جدا قولك(فلأني لست مهم فلا اتكلم عنهم)

تحياتى لك وكل تقدير واحترام

مدونه ما كفايه بقى يقول...

هبه فاروق

ادينا صابرين يا مسهل بس رغم كلامك انا بجد مبقتش احبه زى الاول بس يمكن ارجع احبه تانى لما اشوف منه موقف كويس ممكن تكون حاجه وقتيه يا عالم

بس فى الاول والاخر هما ست شهور وهيمشى يعدوا بقى بحلوهم ومرهم وخلاص

تحياتى

مدونه ما كفايه بقى يقول...

سيدى الرئيس

انت مش كنت مشيت خلاص رجعت تانى ليه؟هههههههه

انت مرحب بيك فى اى وقت يا ريس سيبك انت

كلامك صح ونبهتنى لحاجه مكنتش واخده بالى منها

بس سؤال ليه الجيش معتذرش للشعب على الموقف ده ومتقوليش ان اعتذاره اللى على الفيس بوك اعتذار رسمى والا يبقى جيش خيخه واى كلا وليه التلفزيون المصرى متكلمش عن اللى حصل ؟

سؤالين مطروحين مش لاقيلهم اجابه الا ان الجيش ضعيف جدا فى تصرفاته

تخيل يا ريس ان معتقلى الثوره لسه مفروج عنهم من يومين بس ده تسميه ايه ده بقى؟

وفى الاخر انا مبقتش احب الجيش زى الاول

رشيد أمديون يقول...

السلام عليكم
أولاالحمد لله على سلامتك، ومبروك نجاح الثورة.
ثانيا أردت أن أقو رأيي في مسألة إنشاء الإخوان لحزب سياسي، بحيث أنه يمكن للجماعة أن تحافظ على روح الدعوة إن خصصت شقا للسياسة وشقا للدعوة وعملها المعرف..
طبعا يكون هنا خوف من الذوبان في العمل السياسي الذي يطمس هدف الجماعة كتنظيم اسلامي له رؤيته وأهدافه.

حياك الله تعالى.

♥ ♥ Amira Samy ♥ ♥ يقول...

حبيبتى مبروووووك
الأسم الجديد
و العودة الكريمة نورتى
مدونتك و كل الدنيا
رغم انى مختلفة معاكى فى
موضوع حزب الاخوان دى
بس باقى الكلام صحيح
الجيش بطىء فى تحركاتة خالص
و بعدين ابقى افتحى الميل
كنت عوزاكى فى موضوع
سلام حبيبتى

الميكروباص يقول...

هي المشكله اللي احنا واقعين فيها دلوقت واللي انا خايف منه عارفه ايه؟
ان احمد شفيق يمشي
لو حصل ده يبقى البلد يتم حكمها من ميدان التحرير ودي تبقى مصيبه
وانتي تعلمي جيدا العقول عندنا- انا سمعت واحد بالامس بيقولي ان شاء الله بعد ما نشيل شفيق هانطلع عشان نشيل طنطاوي

كده العمليه بقت لعبه

الميكروباص يقول...

على فكره
نفس التفكير تقريبا موجود في تونس
بالامس كان هناك مظاهرات وتم التعامل معهم من جانب الجيش والبوليس عن طريق الضرب
والسبب ان الامر فعلا زاد عن حده
ليس هناك أكبر من رحيل ئيس الجمهوريه
نبغي على الناس التروي فيما بعد ذلك حتى لا تنفلت الامور

Unknown يقول...

هيه العرب بدأوا يفوقوا
ربنا يستر :)

أقدم عاصمه فى الحب يقول...

السلام عليكم

انا كان فاضل يوم واحد وانزل ميدان التحرير واعمل مظاهره علشانك
ليه الغيبه دى كلها .. هو بابا يعنى يقطع النت .. ومافيش عند صاحباتك نت او حتى على الموبايل ..؟!
ينفع والنبى ...؟!
ومع ذلك نسيت العتاب اول لما شفت البوست الجديد مبروك علينا كلنا الثوره
.
.
بصى بقه
انا فى كلمه واقفه فى ظورى من يوم تواصلنا مع بعض على النت
أقولها ..؟! ولا بلاش ..؟!
أٌقوله بقه وأمرى لله
انتى ليه أخوانيه ..؟!
علشان بابا يعنى .. ولا انتى فعلا متوافقه مع مبادىء الاخوان ..؟!
بجد والله انا نفسى تقوليلى مبرر اقتنع بيه ..
بس سيبك انتى
ربنا لا يحرمنى منك ولا يحرمنى من طلتك عندى فى المدونه الجديده يا ارق بنت بلد فى الدنيا
نسيت صحيح
أحلى شيكولاتايه من الحجم العائلى من النوع الجلاكسى :)
دوماً أصدقاء :)

الشاب الصح يقول...

السلام عليكم ورحمه الله وبركاته
حمدا لله على سلامتك..انا اعتبرتك من شهداء الثوره..هههه
(مبارك) عودتك ويا (جمال) اسم المدونه الجديد و اعزك الله ب(عز) الاسلام و يجعلك فى سلام وامان زى مرجان احمد مرجان...اما بالنسبه للاخوان فهى جماعه اسلاميه بجانب الحزب السياسى و هذا وسيله وليس غايه لتحقيق فكر الجماعه الموازى لفكر الاسلام الشامل و احبز انا تشاهدى فيديو د/محمد الكتاتنى فى موقع الاخوان المسلمون يرد على سؤالك و الاسئله المتعلقه بالحزب...اما بالنسبه لمن يسأل لماذا انت من الاخوان لكى حريه الرأى و لكن لو سمحتى اعلق الاخوان المسلمون فكر و ليس اشخاص يقول الامام الشهيد حسن البنا(كم فينا و ليس منا و كم منا و ليس فينا) فرجائى اليك ان تتطلع على هذا الفكر و تعرف لماذا هى وغيرها من الاخوان و على فكره انا اعرف ناس كتير اباهنم مش من الاخوان و هما اخوان والعكس المقياس من هو مقتنع بالفكر و يضحى من اجله...جزاكم الله خيرا احبتى فى الله تحياتى لكم جميعا..

مدونه ما كفايه بقى يقول...

اقدم عاصمه فى الحب

اه صح فعلا بدليل انك سألت عليا لما غبت فتره مش كده؟؟:(

انا كنت لحد اللحظه اللى فاتت مدايقه منك بس لما لقيتك منور المدونه عندى نسيت الزعل خلاص :)

اما بقى ردى على سؤالك فنا عايزه اوضح حاجه الاول

عندنا مبدأ فى الاخوان اسمه حريه الاختيار خلاتصه ان اى واحد ابن اخوان ليه الحق بعد سن الرشد انه يختار انه ينضم للجماعه ويشاركها فى الخطوات اللى الجماعه بتعملها ام ينسحب ويخرج من الجماعه علشان كده تلاقى عندنا مثلا اخ ابنه منضم للسلف او مش منضم لاى جماعه خالص علشان كده مستحيل مستحيل انى اكون من الاخوان لان والدى ووالدتى منهم اوك؟

ثانيا بقى

انا مش هدافه عن الاخوان واقول انهم احسن ناس او انهم فعلا صح والشويتين دول حتى لو صح فعلا

انا استمريت مع الجماعه لاقتناعى الداخلى انى من غيرهم مش هحس انى عارفه ربنا صح لانى مقتنعه تماما ان الاسلام دين الوسطيه ومعاهم لقيت كل وسطيه لانى لو خرجت منهم هحس انى تايهه بجد

انا ممكن اكون مش ملتزمه بأفكارهم والعيب فيا طبعا مش فيهم وممكن اوى كمان انهم ميفخروش انى منهم بس انا ليا كل الفخر انا منهم

كلامى ممكن يكون صعب التصديق شويه بس اللى يدخل الجماعه ويعرفهم صح ويسمع لهم هيعرف انهم بيمثلوا الاسلام المعتدل الملتزم المواكب لكل العصور

وانا عايزه ايه غير حد ياخد بأيدى ويوصلنى للطريق الصح أصلا احنا اتخلقنا ليه غير عشان نعبد ربنا صح وندعو الناس للعباده

هتفق معاك ان مش كل الاخوان كويسين بس الانسان خطاء بطبعه وان كان فى حد فينا مش كويس ( وأولهم أنا على فكره) فده لانه فهم فكر الجماعه غلط او انه منضم للجماعه ليكون مجرد تباهى اما الاخرين انه من جماعه الاخوان المسلمين

أخيرا انا اخوانيه لانى كل ما بسمع كلمه بسيطه لعضو فى جماعه الاخوان بيزيد تمسكى بالجماعه أكثر

ممكن ردى ميكنش أقنعك بس هقولك انك لو اخوانى فعلا هتحس بكل كلمه قلتها

ممكن تقولى يعنى هو الناس العاديه دول كفره طيب ما هم بيصلوا ويصوموا ويحجوا مش ده الاسلام برده؟

الاسلام اوسع بكتير من مجرد صلاه وصوم وحج وزكاه اكيد الحاجات دى كبيره اوى فى الاسلام بس مش كل حاجه وده اللى الجماعه تبنته وده اللى مخلينى متمسكه بالجماعه حتى أخر نفس فى جسدى

الاخوان دعوتهم شموليه مش هقدر اوضح ده كله بس لو قرأت عن الاخوان المسلمين (بشرط انك تقرأ من كاتب حيادى لا ينتمى للجماعه او لضد الجماعه) هتعرف يعنى ايه بجد جماعه الاخوان المسلمين مش الاشاعات اللى بتطلع عنهم او اشخاص من الجماعه بتقابلهم وتاخد انطباع سيىء عن الجماعه بسببهم

الجماعه مش أشخاص وزى ما الشاب الصح قال الجماعه فكر سليم ومبدأ اسلامى واضح لا يحيد عنه أفراد الجماعه (الصح)

وأدينى رديت على سؤالك وأيدى وجعتنى من الكتابه عاجبك كده؟ هههههههههه

شيكولاته كبيره ليا وجلاكسى كمان؟؟؟؟؟؟؟

كده انت ميه ميه بس للاسف مش هشكرك لانها مش حقيقيه لما تبقى حقيقيه ابقى اشكرك عليها يلا بقى هه

طبعا سعيده بصدلقتك وانا كنت اطول اعرف حد بالرقه دى فى بلدى ده انا ساعات بقول ازاى احمد يدخل مدونتى التافهه دى اه والله

ربنا يخليك ليا يا احمد ونفضل اصدقاء دوما يااااااااااااا رب

كل تحيه وتقدير الى ابن بلدى

مدونه ما كفايه بقى يقول...

الشاب الصح

يا ريييييييييييت دى كانت امنيتى بجد بس يختار الله من يشاء الحمد لله على كل حال

مبارك وجمال وعز مره واحده حسبنا الله ونعم الوكيل ههههههههههه زى مرجان هه ايه الحلاوه دى هههههههههه

بالنسبه بقى لموضوع الاخوان وانشاء حزب تصدق كلامك اقنعنى سبحان الله مع انى كنت مصممه على رأيى تماما

بس يا رب الاخوان ميدوش الحزب اكتر من حقه على حساب النشاطات الاخرى وده كل خوفى بس زى ما قلت الثقه فى القياده درس اتعلمته كويس فى الجماعه ول حصلت حاجه منهم غلط ميدان التحرير موجود فى أى وقت هههههههههههه انا عن نفسى مش هسكت

كلامك عن الجماعه صح طبعا ومقدرش اغلطك

الواحد بيحمد ربنا بجد انه اختاره يبقى فرد فى الجماعه

السلام عليكم

مدونه ما كفايه بقى يقول...

لورنس العرب

اسفه على تأخرى فى الرد على تعليقك

انا بس عايزه اسألك انت مقتنع بحاجه اسمها الشرعيه الثوريه؟

ودى معناها ان الشرعبه للشعب هو اللى يقرر اللى عاوزه ودى بتبطل اى نظام قائم وما دام الشعب عايز شفيق يمشى يبقى لازم يمشى ده اللى لازم النظام يفعمع وبعدين فيها ايه لو الحكم من ميدان التحرير مع العلم ان الميدان اثبت انه فيه اعقل ناس على وجه اليسطه

على الهامش عيع ملنه لورنس يعنى امير مش كده؟

الشاب الصح يقول...

مش عارف ليه اسم مصر حره افضل من وجه نظرى لكن مصر الحديثه حاسس ان انا فاتح كتاب دراسات فى الابتدائى او الاعدادى هههههه معلش دى و جهه نظرى
http://www.youtube.com/watch?v=M1ME91g36Eg
يمكن يكون الاسم محروق(مصر الحديثه) لكن لكى حريه الاختيار و ده رأى اسف لو مش عاجبك تحياتى لك
الاختلاف فى الرأى لا يفسد للود قضيه

مدونه ما كفايه بقى يقول...

الشاب الصح

ها ايه رأيك ؟ اى خدمه

مصر حره احلى فعلا اول مره اسمع الاغنيه دى بس بجد رائعه حساها صادقه اوى مش زى الباقى

افروديت يقول...

ازيك يااموله
حلواسم البلوج بيناسب المرحله الجديدة
مبرووك ع النصر
شوفي بتقولي أن الأخوان لوعملواحزب هيبقي توجههم سياسي فقط .
أولآ/ الأخوان فكروايعملوا حزب عشان لازم يبقي ليهم حزب رسمي معترف به يمثلهم في المجلس أوفي غيره .
وعمل حزب للأخوان لايفقدهم شيئآ
فالحزب سيكون وليد وفرع رسمي سياسي معترف به من جميع الجهات الرسمية والأحزاب والأفراد في الدولة
لاتنسي أن قبل الثورة كانوالايسمونهم سوي ب "المحظورة" ولكن بعدالثورة أعترف بهم الدولة بل أمتدالأعتراف الي انهم حضروا أجتماعات مع عمرسليمان وباقي الأطراف بل وظهرعددمن رموز الجماعة في التليفزيون المصري الحكومي وأظن أن هذا كان يحدث لآول مرة منذزمن بعييييييييييد
لذا فلاتقلقي من عمل الحزب لأنك لوكنتي تعتقدي أن الأخوان وهم جماعة أسلامية لاتسعي للحكم أوللترشح في المجالس تكوني غلطانه بصراحة الأخوان يهمهم جدآيكونوافي المجلس وبنسبة كبيرة والوزارة اذا أستطاعوا ولكن ليس الأن وقت الدولة الأسلامية فهم يعلمون أن الشعب غيرمستعد لذلك ولن يقبل به
" أحناعايزينها مدنية " وبسسسسسسس
تحياتي

مدونه ما كفايه بقى يقول...

افروديت

منوراااااااااااانى

كلامك صحييييييييييييح ولا اعتراض

بس حاجه بسيطه

المدنيه موجوده فى الدين الاسلامى لانه ببساطه مواكب لكل العصور

تحياتى لكى

الشاب الصح يقول...

ردى على اسم المدونه هنا ...مفاجأه
http://elshabelsa7.blogspot.com/2011/02/blog-post_4024.html